الیکشن کمیشن نے پولنگ عملے کی تربیت کے دوران غیر حاضری کے واقعات کا نوٹس لیتے ہوئے ان کے خلاف سخت کارروائی کا فیصلہ کیا ہے۔
8 فروری کو ہونے والے عام انتخابات کے لیے ملک بھر میں پولنگ عملے کی تربیت جاری ہے اور اس میں غیر حاضری کے واقعات کا الیکشن کمیشن نے نوٹس لیتے ہوئے غیر حاضر عملے کے خلاف سخت انضباطی کارروائی کرنے کا فیصلہ کیا ہے۔
ترجمان الیکشن کمیشن کے مطابق اس حوالے سے چیف الیکشن کمشنر نے تمام چیف سیکرٹریز اورصوبائی الیکشن کمشنرز کو ہدایات جاری کر دی ہیں جس میں کہا گیا ہے کہ وہ پولنگ اسٹاف کی تربیت کے دوران ان کی حاضری کو یقینی بنائیں۔
چیف الیکشن کمشنر نے یہ بھی ہدایت کی ہے کہ تربیت کے دوران غیر حاضر ملازمین کی معطلی اور ضابطے کی کارروائی یقینی بنائی جائے۔ اس معاملے پر کوئی غفلت برداشت نہیں کی جائے گی۔
